Leta yasheshe komite y’impunzi yashinjwe kuba izingiro ry’imyigaragambyo mu nkambi ya Kiziba

Nyuma y’igihe hagaragara ibikorwa by’imyigaragambyo mu nkambi y’impunzi ya Kiziba, Minisiteri y’Imicungire y’Ibiza n’Impunzi yafashe umwanzuro wo gusesa komite izihagarariye ishinjwa kuba ariyo yahembereye impamvu zaganishije ku myigaragambyo.

Mu itangazo rya Guverinoma y’u Rwanda ryashyizwe ahagaragara kuri uyu wa Mbere tariki ya 30 Mata 2018, rivuga ko igenzura ry’ibanze ryagaragaje ko icyihishe inyuma y’iyi myigaragambyo ari Komite ihagarariye impunzi yari ifite inshingano zo gufasha mu inozabikorwa mu nkambi, aho kuzuzuza igakomeza gushishikariza impunzi kwigumura ku nzego z’ubuyobozi bwa Leta ndetse n’abafatanyabikorwa; zikababuza kugera mu nkambi, bikabyara akaduruvayo mu nkambi, bigateza umutekano muke mu nkambi no mu nkengero zayo.

Rikomeza rigira riti “Minisitiri w’Imicungire y’Ibiza n’impunzi, ashingiye ku mabwiriza ya Minisitiri No 01/2017 yo ku wa 3 Ugushyingo 2017 agena imigendekere y’amatora ya komite mu nkambi no mu mijyi, afashe icyemezo cyo guhagarika komite ihagarariye impunzi mu nkambi ya Kiziba kandi iki cyemezo kigatangira kubahirizwa guhera uyu munsi, nka kimwe mu byemezo byo gusubiza ibintu ku murongo n’iyubahirizwa ry’amategeko mu nkambi no mu nkengero zayo.”

“Minisiteri kandi iramenyesha ko imyitwarire mibi, akaduruvayo n’ubushotoranyi bigaragara mu nkambi ya Kiziba bihabanye n’amategeko kandi ko bigomba guhita bihagarara hagamijwe kugarura amahoro, umutekano no kubahiriza amategeko mu nkambi no gukoresha ibiganiro mu gukemura ibibazo bihari.”

Iri tangazo rivuga ko Guverinoma y’u Rwanda ifite inshingano zo kurinda umutekano w’abanyarwanda bose n’uw’impunzi icumbikiye. Impunzi zose zasabwe gufasha mu gusubiza ibintu ku murongo mu nkambi, kandi ko uzagerageza kubangamira ishyirwa mu bikorwa ryabyo, azaba yishe amategeko kandi akabihanirwa.

Risoza rigira riti “Guverinoma y’u Rwanda izakomeza gukorana n’abafatanyabikorwa batandukanye, barimo amashami y’Umuryango w’Abibumbye mu kuzamura imibereho no kwita ku mpunzi zose zicumbikiwe ku butaka bw’u Rwanda.”

Ku wa 20 Gashyantare 2018 nibwo Impunzi z’Abanye-Congo zari zicumbikiwe mu nkambi ya Kiziba mu Karere ka Karongi zigaragambije, zizinduka zizinga ibyazo zerekeza ku biro by’Ishami ry’Umuryango w’Abibumbye ryita ku Mpunzi (HCR), ngo zirekurwe zitahe muri Repubulika Iharanira Demokarasi ya Congo.

Izi mpunzi zavugaga ko inkunga zigenerwa yagabanutse cyane, kugeza aho ubu umuntu umwe agenerwa amafaranga y’u Rwanda 6700 yo kumutunga mu gihe cy’ukwezi. Ku bw’ibyo zikavuga ko aho kwicwa n’inzara zasubira ku ivuko nubwo zibwirwa ko hataratekana.

Nyuma y’iminsi itatu zisohotse mu nkambi, habaye imyigaragambo ikomeye mu kuyihosha Polisi y’u Rwanda yatangaje ko impunzi eshanu zitabye Imana ubwo zashakaga kurwanya inzego zishinzwe umutekano.

Itangazo Polisi yashyize ahagaragara icyo gihe rivuga ko ‘muri icyo gikorwa cyo gushyamirana, hakoreshejwe ingufu hakomereka abigaragambyaga 20 n’abapolisi barindwi bajyanwe kwa muganga. Ubu hamaze gupfa abigaragambyaga batanu bitewe n’ibikomere bari bagize, naho 15 batawe muri yombi kubera iyo myigaragambyo itemewe, gufata bugwate n’imirwano.”

Abatawe muri yombi bagera kuri 21 bari bayoboye iyo myigaragambyo bahise bafungirwa kuri Station ya Bwishyura mu Karere ka Karongi ndetse ubu urubanza rwabo ruri kubera mu Karere ka Muhanga.

Minisitiri w’Ububanyi n’Amahanga, Louise Mushikiwabo, aherutse gutangaza ko uburyo u Rwanda ruri gukurikirana imyitwarire y’impunzi bidakwiye kumvikana ko byatera ubwoba izindi zishaka kuruzamo  kuko nta kibazo rwagirana nazo zibashije kubahiriza amategeko.

Mushikiwabo kandi yavuze ko icyateye ukwigaragambya kw’izi mpunzi z’Abanye-Congo atari ukugabanuka kw’amafaranga azitunga nkuko byavuzwe; ahubwo benshi muri zo babuze amahitamo y’icyo bakwiye kuba.

Ati “Ni impunzi zimaze imyaka myinshi irenga 22, ntizisubiye iwabo, ntizibaye abanyarwanda kuko u Rwanda rwigeze gutanga amahirwe yo kuba abanyarwanda, abandi barabyanga kuko bumvaga ko bazasubira iwabo.”

“Uretse ibyo kuvuga ngo umuryango ushinzwe impunzi wa Loni wagabanyije ibyo kurya, icyo ni ikibazo rusange kireba impunzi zose ariko ntabwo ari ikibazo cyatuma impunzi zigaragambya muri buriya buryo hakazamo n’amahane akomeye yo gutera abashinzwe kubarinda.”

Yakomeje avuga ko abenshi muri ziriya mpunzi bashaka kujya kuba mu bihugu by’u Burayi na Amerika; abandi bashaka kuba abaturage b’u Rwanda.

Ati “Abenshi muri ziriya mpunzi barashaka kuba abanyarwanda kuko hari abasabye kuba abanyarwanda, barashaka no gusubira iwabo noneho bagashaka no kujya gutura mu mahanga i Burayi na Amerika. Urumva rero ntiwaba ibintu bitatu icyarimwe.”

Kugeza ubu, u Rwanda rucumbikiye impunzi zisaga 173 000 ziganjemo iz’Abanye-Congo n’Abarundi.

Ubwo izi mpunzi zasohokaga mu nkambi zerekeza ku biro bya HCR i Karongi

Leave a Reply

Your email address will not be published. Required fields are marked *