Dj Avicii uherutse gupfa,yariyahuye!!!

Nyuma y’iminsi icumi apfuye, umuryango wa Tim Bergling wamenyekanye cyane nka Avicii mu mwuga wo kuvanga imiziki mu njyana ya ‘electronic’ nka Avicii, wahishuye ko yiyahuye 

DJ Avicii ukomoka muri Suède yapfuye afite imyaka 28, yasanzwe muri hoteli imwe yo mu Mujyi wa Muscat, Umurwa Mukuru wa Oman ku wa Gatanu, tariki ya 20 Mata 2018.

Mu itangazo ryasohowe n’umuryango w’uyu mugabo wari umaze kuba icyamamare mu bavanga umuziki ku Isi, bavuze ko umuryango we watewe intimba n’urupfu rwe, bashimangira ko ngo “yashakaga kubona amahoro.”

Ryagiraga riti “Tim mwiza wacu yari  umuhanzi w’umunyamagara make wari ugishakisha ibisubizo ku bibazo yibazaga mu kubaho mu buzima, nta makemwa yagenze ingendo nyinshi akanakora cyane, ku rugero rw’uko yari asigaye afite umunaniro ndengakamere.”

Avicii yari amaze igihe ahagaritse urugendo rw’ibitaramo yari afite ahanini bitewe n’ibibazo by’ubuzima yari amaranye iminsi bitewe n’imiti yongera imbaraga yakoreshaga kugira ngo abashe gukora ibitaramo bye nta mpungenge.

Itangazo ryemeza ko yiyahuye rikomeza rigira riti “Ubwo yabihagarikaga yashatse umutuzo ngo yishime mu buzima bwe kugira ngo anakore icyo yakunze kurusha ibindi: umuziki. Yarwanye cyane n’ibyiyumviro bye muri ibyo byose yahuraga na byo, ubuzima bwe, umunezero, ntabwo yari bugende atyo, yashakaga kubona amahoro.”

Iri tangazo rinavuga ko ababyeyi b’uyu muhanzi berekeje muri Oman gutegura umuhango wo kumusezeraho no kumva neza impamvu y’urupfu rwe. Avicii yateye intimba benshi mu muryango we ndetse n’abakundaga ibihangano yagiye agiramo uruhare.

Yacurangaga mu bitaramo bikomeye

Avicii yasohoye indirimbo ya mbere mu 2011 ayita “Levels”, indirimbo za Etta James yasubiyemo mu buryo bugezweho nazo ziri mu zo yamenyekaniyeho cyane. Mu 2013, indirimbo “Wake me up” yakoranye na Aloe Blacc yatumbagije ubwamamare bwe, byatumye aba umwe mu ba DJs binjije amafaranga menshi ku Isi mu 2014.

Itangazo ryasohowe n’umuryango wa Avicii rigaragaza ko yiyahuye rije nyuma y’uko umuvugizi we nyuma gato y’urupfu rwe yari yahakanye kwemeza cyangwa guhakana ko yaba ari we wiyambuye ubuzima.

Umuryango wa Avicii wari umaze iminsi ushimira abafana n’abandi bantu batandukanye bohereje ubutumwa bwo kuwihanganisha ndetse n’abamaze iminsi bakora ingendo mu mujyi wa Stockholm aho yavukiye mu buryo bwo kumwibuka no kumusezeraho.

Uyu mu DJ wari ukomeye ku Isi azwi no mu ndirimbo nka ‘‘Hey Brother’’ n’indi yaherukaga gusohora yitwa ‘‘Lonely Together’’ yafatanyije na Rita Ora.

Mu 2016, yatangaje ko ahagaritse ibyo bikorwa. Icyo gihe yagize ati “Ndabizi ko ndi umunyamahirwe kuzenguruka Isi nkabacurangira gusa mfite igihe gito cyane ku buzima bw’umuntu ndiwe nyuma y’ubuhanzi.”

Avicii yatangiye umwuga w’ubu Dj mu 2008 ubwo yatsindaga irushanwa ryo gukora imiziki ryakoreshejwe na Pete Tong. Yaje no kuza mu bahatanira Grammy Awards inshuro ebyiri, ndetse agira indirimbo icyenda zazaga mu 10 za mbere zikunzwe mu Bwongereza, harimo ebyiri zaje ku mwanya wa mbere.

Leave a Reply

Your email address will not be published. Required fields are marked *

Pin It on Pinterest

Social Media Auto Publish Powered By : XYZScripts.com