Kanye West yise Trump umuvandimwe we biteza impagarara

Umuraperi Kanye West yatangiye kotswa igitutu nyuma yo gusubukura gukoresha urubuga rwa Twitter agatangirira ku magambo y’uruhererekane yo kugaragaza ko ashyigikiye Perezida Trump.

Kanye West yanditse ubutumwa bwinshi ku rukuta rwe rwa Twitter ashimangira ko ashyigikiye Perezida Trump ndetse harimo n’ifoto y’ingofero yanditseho “Make American Great Again,” yashyizweho umukono n’uyu muyobozi.

Yanditse ati “Ntabwo ari itegeko ko buri wese ahamanya na Trump ariko ako gatsiko ntabwo katuma ntamukunda […] Ni umuvandimwe wanjye. Nkunda buri wese. Ntabwo nemeranya n’ibyo buri wese akora. Icyo ni cyo kitugira abantu batandukanye. Kandi buri wese afite uburenganzira bwo kugira ibitekerezo bye ku giti cye.”

Trump yamusubije ati “Urakoze Kanye, byiza cyane.” Yanahise asangiza abamukurikira ubutumwa bw’uyu muraperi.

Ibi byakuruye impaka mu babonye ubwo butumwa bwombi ndetse benshi bibasira Kanye ku bw’ayo magambo yatangaje. Umugore we, Kim Kardashian yahise yinjira mu kiganiro ashyigikira umugabo we.

Kim yagize ati “Ku itangazamakuru rishaka gushyira hasi umugabo wanjye reka mvuge ibi… ibitekerezo byanyu kuri Kanye ngo yatunguranye, ngo ‘tweets’ ze ni iteshamutwe, biteye ubwoba. Murihutira kuvuga ko yagize ibibazo by’imitekerereze ku bwo kuvuga ikimurimo kandi ari nako byahoze. Ntabwo binyuze mu mucyo.”

Kanye yananenze Obama wabanjirije Trump avuga ko yayoboye imyaka umunani igashira nta mpinduka na zimwe abonye mu Mujyi wa Chicago bombi baturukamo.

Aya magambo nayo yakoze mu bwonko bamwe mu bakoresha Twitter banditse ibitekerezo bitandukanye bakifashisha amagambo yo mu ndirimbo ye yasohotse kuri album ya 2016 yise ‘The Life of Pablo’ avugamo ko akumbuye Kanye West wa kera.

Abandi bamushinje ko atita ku birabura bagenzi be, ibintu byamaganiwe kure n’umugore we, Kim Kardashian, wahise avuga ko ari ibintu bizwi neza ko umugabo we atajya ahamanya n’imitekerereze ya benshi akaba ari nacyo amukundira ndetse bigatuma amwubaha.

Yagize ati “Mu myaka izaza ubwo umuntu wundi azavuga ibihuye neza n’ibi ntabe afatwa nk’uko we afatwa, muzamusingiza! Kanye ari mu gihe kizaza imbere.”

Impaka ku mitekerereze ya Kanye West zabaye nyinshi ndetse zinjirwamo n’abantu batandukanye basanzwe ari ibyamamare muri Leta Zunze Ubumwe za Amerika, barimo n’umuraperi Chance The Rapper wavuze ko yitandukanyije n’abahuje ibyo yavuze n’uburwayi mu mitekerereze yagiye agira.

JPEG - 172.5 kb
Bari bamaze igihe badacana uwaka

Kanye West yavuze ko yamuhamagaye akamubwira ko ashaka ko asobanura neza ibyo yatangaje. Yavuze ko atemera ibyo Trump akora byose cyangwa undi uwo ari we wese utari we ku giti cye.

Mu Ukuboza 2016, Kanye West yasuye Donald Trump mu biro bye yakoreragamo i New York bagirana ibiganiro mu muhezo, ndetse banashimangira umubano wabo bavuga ko bamaze igihe kirekire ari inshuti zikomeye.

Umubano wabo waherukaga kuvugwaho mu itangazamakuru ubwo uyu muraperi yamwipakururaga muri Gashyantare 2017, agasiba ibyiza yamuvuzeho byose ku rubuga rwa Twitter, bigakekwa ko yabitewe n’imyanzuro idasanzwe Trump yafataga akigera ku butegetsi.


Leave a Reply

Your email address will not be published. Required fields are marked *

Pin It on Pinterest

Social Media Auto Publish Powered By : XYZScripts.com