Abahanga bakomeje kubunza imitima bashaka ikizarokora Isi ikibuye cya rutura mu 2135

Abahanga bakora mu kigo cy’ubumenyi bw’Ikirere muri Leta Zunze Ubumwe za Amerika, NASA, bavuga ko ikibuye kinini cyane cya 101955 Bennu kizinjira mu nzira y’Isi mu isanzure mu mwaka wa 2135, ku buryo kizateza ibyago bikomeye kuri uyu mubumbe.

Ni ikibuye cya rutura kiruta inyubako nka Tour Eiffel yo mu Bufaransa cyangwa Empire State y’i Manhattan muri New York, kuko gifite metero 490 z’ubugari kigapima toni miliyari 3,4.

Abahanga ba Nasa bavuga ko Bennu izinjira inzira y’Isi muri Nzeri 2135. Imibare y’abahanga igaragaza neza ko kuba cyazagonga Isi biri hasi cyane kuko bibarwa nibura rimwe ku 2,700 cyangwa 0.037 ku ijana, ariko ntibanahisha ko hari uburyo kizahungabanya ubuzima ku Isi.

Bennu ngo izenguruka izuba ku muvuduko wa 100.000 km/h, ku buryo nitambuka hafi y’Isi izayoherezaho ingufu zikubye gatatu iz’ibisasu kirimbuzi byaturikijwe mu mateka.

Mu gushaka uko bazabyitwaramo, NASA yiyemeje gukorana n’ibigo bikomeye birimo inzego zishinzwe umutekano muri Amerika n’ibigo bicura intwaro.

Umugambi ni ugucura ikintu cyazafasha mu kuyobya inzira y’icyo kibuye. Hari icyatekerejwe cyiswe HAMMER (Hypervelocity Asteroid Mitigation Mission for Emergency Response) biteganywa ko azaba ari ikigendajuru kizohereza missile z’ubumara kuri icyo kibuye.

Mu 2016 Nasa yohereje mu kirere ikigendajuru cyagiye mu butumwa bwiswe Osiris-Rex bugamije gukusanya amakuru kuri icyo kibuye cya rutura, aho kizagera neza kuri icyo kibuye mu Ukuboza, kigatanga amakuru yose ashoboka kugeza mu 2023 ubwo kizagaruka ku Isi.

Dr Michael Moreau umwe mu bari gukurikiranira hafi ubwo butumwa, yavuze ko hashobora koherezwa ikindi cyogajuru kijyanwe no gusiga irangi kuri Bennu gusa, ibintu byahindura icyerekezo cy’iryo buye.

Iryo rangi ngo ryasigwa uruhande rumwe rw’iki kibuye ngo ryatuma gikubitwa n’izuba cyane, kikarushaho gushyuha maze kigahindura inzira kigenderamo ntikibe kigihamije Isi.

Mu kiganiro yagiranye na Gizmodo, Dr Moreau yagize ati ’No gusiga irindi bara gusa ku gice kimwe byahindura ibipimo by’ubushyuhe maze kigahindura inzira kinyuramo.”

Bennu yavumbuwe ahagana mu 1999, ariko ibipimo bikomeza kugaragaza ko izateza ibibazo haba mu kugonga Isi cyangwa guca hafi yayo gusa.

Nubwo nta muntu uzi igihe ibibuye biri hafi y’Isi bishobora kuzahubirana nayo nyuma yo kwinjira mu nzira izengurukamo, abahanga bahamya ko byaba vuba cyangwa kera, byigaragaza ko bizabaho.

Mu buryo bwo kuzifashisha HAMMER ubusanzwe ireshya na metero icyenda n’uburemere bwa toni 8.8, bishobora kuzakorwa haturitswa uwo mubumbe, mu gihe ubundi buryo bwose bwaba bwananiranye.

Abahanga bavuga ko gusiga Bennu ibara ryirabura byatuma ikubitwa n’izuba igahindura amayira

Ikibuye cya Bennu gihangayikishije abahanga mu buryo bukomeye

Leave a Reply

Your email address will not be published. Required fields are marked *