Mu bihugu bitandukanye hari imitwe kabuhariwe ya gisirikare ikora akazi gateye ubwoba kadapfa gukorwa n’abandi basirikare basanzwe kandi bakagakora neza. Ku rundi ruhande ariko wirengagije uko iyi mitwe iba yaratojwe hari igihe igira gutya ikisanga mu bintu idashobora kugenzura bigatuma ubutumwa yahawe budasohozwa.
Dore ibikorwa bitanu uhereye inyuma mu icumi tuzabagezaho bitagenze uko byari byateguwe.
  1. Ibikorwa byo kubohora imbohe muri Yemen (Yemen Hostage Rescue Operations)

Mu 2014, umutwe wa Navy Seals wo mu gisirikare cya Leta Zunze Ubumwe za Amerika wagerageje igikorwa cyo kubohoza imbohe zari zarafungiwe muri Yemen na Al Qaida. Iki gihugu nubwo cyari kirimo ibirindiro by’ingabo za Amerika ntibyabujije ko kiza no kuba indiri y’ibikorwa by’iterabwoba.

yemen-hostage-rescue-operations

Mu bantu bari bafashwe bugwate, harimo uwahoze ari umunyamakuru w’Umunyamerika, Luke Somers. Uyu mugabo wavukiye mu Bwongereza, yabaga muri Yemen ubwo yashimutwaga mu 2013. Umutwe wa Seals wabashije kubohoza imbohe 8 ndetse yivugana ibyihebe 7. Nyamara ariko, Somers n’izindi mbohe 4 bari bimuwe aho bari bafungiye mbere y’igitero cyo kujya kumubohoza. Nyuma hakurikiyeho ibikorwa byo kumubohoza na bagenzi be.

Kubw’amahirwe macye ariko, ubwo hageragezwaga kumubohoza bwa kabiri, Somers n’indi mbohe barakomeretse bikabije abashinzwe ubutabazi bagerageza kubavura ariko ntibyagira icyo bitanga. Iyo mbohe yindi yaje gupfira mu ndege yari ibacyuye, mu gihe Somers we yaje gupfa nyuma gato bageze aho bari bajyanywe ku bwato bwa gisirikare butwara indege.

Nyuma y’iki gikorwa, igisirikare cyanenzwe kunanirwa gutabara Somers nubwo izindi mbohe hafi ya zose zari zabohojwe, ndetse hongerwaho ko n’ubundi izo mbohe zo zendaga no kurekurwa.

  1. Igikorwa cyiswe Bravo-Two-Zero

Umutwe wa SAS (Special Air Service) wo mu Bwongereza, ufatwa nk’umutwe w’ingabo zidasanzwe wa mbere ku Isi kugeza ubu. Nyamara ariko, n’abasirikare batojwe neza ngo bashobora gutungurirwa ku rugamba.

Ibi ni nabyo byabaye kuri uyu mutwe mbere gato y’Intambara yo mu Kigobe. Kugeza n’uyu munsi, ngo hakomeje kugaragara ubuhamya buvuguruzanya ku byabaye mu by’ukuri icyo gihe.

Nk’uko byatangajwe n’umwe mu bari bahawe ubutumwa, ngo bari bahawe inshingano zo kwegeranya amakuru no gutegura aho bazajya bagenzurira ibikorwa byabo mbere y’uko ingabo zo ku butaka zitangiza ibitero. Ku rundi ruhande, undi bari kumwe we avuga ko bari batumwe gusenya imbunda zarasaga missiles za Scud za Irak baharurira ingabo ziteguraga gutera Irak.

bravo-two-zero-real-mission

Icyabaye ni iki? Mbere yo gusoza ibyo bari batumwe, ahantu aba bakomando bari bakambitse haramenyekanye bituma bagabwaho igitero n’ingabo za Irak. Byabaye ngombwa rero ko SAS ihamagara isaba ko baza kuyikura aho hantu, ariko havuka ikibazo cyo kutumvikana neza kuri radio, birangira iri tsinda ry’abakomando kabuhariwe ritatanyirijwe inyuma y’imirongo y’umwanzi.

Nyuma yo gutatana, bamwe mu bari mu itsinda rya SAS ryari ryoherejwe bagiye bicwa umwe kuri umwe, abandi barafatwa, umwe aba ari we wenyine ubasha gucikira muri Syria nyuma yo gukora urugendo rw’ibirometero 180. Abandi basigaye bafashwe baje kurekurwa nyuma y’ibyumweru byinshi barakorewe iyicarubozo rikabije.

Imyaka micye nyuma y’iki gikorwa kitagenze uko cyari cyateguwe, abari bakirimo bagiye bashinjanya kuba umwe ari we nyirabayazana wo kuba ubu butumwa butaragezweho ndetse n’urupfu rwa bagenzi babo. Bivugwa ko uyu mutwe wari wahawe izina ry’ibanga rya Bravo-Two-Zero na n’ubu ukomeje kwandikwaho ibintu byinshi mu byaranze Operation Desert Storm ndetse unakorwaho filimi n’imikino izwi nka video games.

  1. Igikorwa cyiswe Eagle Claw

Umubano wa Leta Zunze Ubumwe za Amerika n’igihugu cya Iran mu myaka isaga mirongo ine ishize ntiwigeze wifata neza na gato. Abayobozi b’iki gihugu bakunze gushinjwa gutegekesha igitugu no kubangamira ubwisanzure. Ariko, ubwo habagaho Impinduramatwara muri iki Gihugu nibwo Leta Zunze Ubumwe za Amerika n’ubukaka bwazo zakojejwe isoni.

Iki gikorwa cyiswe Eagle Craw nicyo nyirabayazana kw’uku gukozwa isoni kwa Amerika. Ni igikorwa cyari cyateguwe ku bufatanye bwa CIA, umutwe kabuhariwe wa gisirikare wa Delta Forces ndetse n’umutwe wa Rangers hagamijwe na none kubohoza imbohe zari zifungiye muri Iran. Byarangiye rero izi mbohe zitabohojwe ndetse bituma na perezida Jimmy carter atakaza akazi ke.

Bivugwa ko imitegurire mibi n’ibikoresho bitameze neza byatumye ubu butumwa busubikwa abari babutumwemo bageze aho bagombaga gukorera. Ariko, ubwo aba biteguraga kuva aha ngo basubire iwabo, ikosa rya kimuntu ryatumye kajugujugu ikora impanuka igonga indege yagombaga gukoreshwa mu kubatwara abantu bari bayirimo bose barapfa. Mu gushaka kuhava rero n’ubwoba bwinshi, byabaye ngombwa ko hasigara kajugujugu 5 zose zimeze neza harimo 2 zahise zinjizwa mu bikoresho by’igisirikare cyo mu kirere cya Iran.

Nyuma yaho, imbohe zendaga kubohozwa zahise zimurirwa ahandi hantu hatandukanye amahirwe yari ahari yo kuzibohoza arayoyoka. Izi mbohe ariko nyuma zaje kurekurwa nyuma yo gusinya amasezerano ya Alger bivugwa ko na n’ubu akigira uruhare rukomeye mu mubano wa Iran na Amerika.

  1. Igikorwa cyiswe Red Wings

Iki gikorwa cyagizwemo uruhare na SEALS ndetse n’umutwe uzwiho kugaba ibitero by’indege wiswe SOAR (Special Operations Aviation Regiment ), cyateguwe hagamijwe gushyira hasi abatalibani bo mu misozi yo muri Afghanistan. Umutwe umwe ugizwe n’iyi mitwe yombi waregeranyijwe, umutwe ugizwe n’abakomando bane ba Seals ubanza koherezwa gutata. Kubw’ibyago, aba bakomando bane baguye mu gaco k’Abataliban habaho kurasana abagera kuri batatu bahasiga ubuzima harokoka umwe.

operation-red-wings

Hahise hoherezwa byihuse abagombaga gutabara, bakirizwa za RPG n’amasasu y’imbunda nto. Indege imwe ya kajugujugu (Blackhawks) yarashwe igisasu cya RPG irahanuka abakomando 16 bari bayirimo bahita bapfa. Ibi nabyo ngo bikaba byaratewe no kutumvikana neza ku itumanaho.

Nyuma yaho, uwarokotse muri ba ba Seals bane witwa Luttrell nawe watabawe n’abaturage, yaje kwandika igitabo cy’ibintu yabonye icyo gihe gihita kinashingirwaho hakorwa film yiswe Lone Survivor.

  1. Igikorwa cyiswe Day of the Rangers (Urugamba rwa Mogadishu)

Uru rugamba ni rumwe muzo Leta Zunze Ubumwe za Amerika zitazibagirwa zarwaniye muri Afurika mu 1993. Ni urugamba Amerika yaburiyemo abasirikare bagera kuri 18 ndetse rukorwaho film yiswe Black Hawk Down.

black-hawk-down-poster-wallpaper-2

Icyari kigamijwe muri iki gikorwa kwari uguta muri yombi ba komanda b’uwari umuyobozi w’inyeshyamba kandi biteganyijwe ko igikorwa kitagomba kurenza isaha. Nyamara, nyuma y’uko imwe muri kajugujugu yari iri gucungira umutekano abari baciye ku butaka ihanuwe, ubutumwa bwo gufata abayobozi b’inyeshyamba bwahise buhinduka ubwo gukiza amagara ku bari batumwe.

Ibintu byahise bikomera byihuse amagana y’Abasomali agotera ingabo za Leta Zunze Ubumwe za Amerika muri Mogadishu, ziza kuhava nabwo bigoranye zifashijwe n’imodoka z’imitamenwa za division ya 10 y’ingabo za Amerika yari mu misozi zifatanyije n’ingabo za Loni. Nyuma yo gupfuba kw’iki gikorwa, ingabo zo mu mutwe udasanzwe za Amerika zose zahise zikurwa muri Somalia zirataha.

day-of-the-rangers-battle-of-mogadishu

Reka dusubikire aha ubutaha tuzabagezaho ibindi bikorwa bitanu bya gisirikare bisigaye bitagenze uko byari byateguwe bikagira ingaruka ku basirikare babaga batumwe.

Source: Wonderlist