Abahanga muri politiki n’ububanyi n’amahanga ndetse n’uburere mbonerabihugu bavuga ko imiterere, inyito n’imyubakire by’ibiro abakuru b’ibihugu bakoreramo bigira icyo bisobanura mu buzima bw’abenegihugu ubwabo ndetse n’andi mahanga ndetse uko byiswe bikaba bifite inkomoko.

10.Palazzo del Quirinale, Perezidansi y’u Butaliyani

Iyi ni inyubako ifite amateka yihariye mu gihugu cy’Ubutaliyani. Uhereye mu 1573 ,iyi nzu nibwo yubaswe na Papa Gregory XIII nk’ahantu yateganyaga kujya aruhukira mu minsi y’izuba ryinshi.

Muri Nzeri 1870 , ubwo ubutegetsi bw’abashumba ba kiliziya (Papa) bwahirikwaga dore ko ari bwo bwayoboraga Leta y’u Butaliyani, Roma yahise igirwa umurwa mukuru w’Ubwami bw’Ubutaliyani, uhereye ubwo, iyi nyubako yahise iba ubuturo bw’abami b’Ubutaliyani .

Umwe mu bami bamamaye cyane kandi bategekeye muri iyo nyubako, ni Umwami VictorcEmmanuel III wari ku ngoma guhera mu 1990-1946. Guhera ubwo iyi nzu niyo Perezida w’Ubutaliyani akoreramo na magingo aya.

9.Palácio de Palanalto, ni Perezidansi ya Brasil

Place du Plateau mu gifaransa , Palace of the Plateau mu cyongereza, nushaka unayite Praça dos Três Poderes , ni inyubako Perezida wa Brasil akoreramo yubatse mu murwa mukuru , Brasilia.

Igishushanyo cyayo cyakozwe n’umuhanga w’umunyabugeni witwaga Oscar Niemeyer abanya Brasil bita The creator of the most importantant in Brasilia ″ .

Nko kuvuga ko uyu munyabugeni bamushimagiza nk’uwaremye ishusho y’inyubako itagereranywa mu mujyi wa Brasilia,mu gihugu cya Brasil.

Uwashushanije iyi nyubako kandi ngo yari afite intego yo kwerekana iyi ngoro nk’imwe mu nzu igaragaza ukwicisha bugufi ( Simplicity ) hamwe n’iterambere ( modernity ) rikataje rya Brasil ,bikagaragarira mu buryo iyi nzu yubatse hamwe n’ibyakoreshejwe yubakwa.

Ni inzu y’amagorofa 4 yubatse ku buso bwa 36,000 m² ikaba ikorerwamo na Perezida wa Brasil ,kandi ni inzu yubashywe cyane muri uyu mujyi by’umwihariko ,ndetse no mu gihugu cya Brasil muri rusange.

  1. Palac Prezydencki i Valsovie muri Pologne

Ni inyubako iri mu mujyi wa Pologne , iyi nyubako kandi ifite ubwiza budasanzwe kuva yakubakwa mu 1643, kugeza magingo aya irakunzwe bihambaye!

Iyo ugeze mu gace ka Krakowskie Przedmiescie yubatsemo ,ukitegereza uko ibengerana ngo wumva utayikuraho ijisho .

Mu 1791 , iyi nzu yakorewemo Inteko nshingamategeko ya Pologne, mu 1818 iyi ngoro yatangiye gukorerwamo n’umuyobozi witwaga Viqueur wa Pologne , wari ukuriye Congress yategekwaga n’Abarusiya mu gihe bari barigaruriye Pologne.

Mu 1918 nyuma y’intambara ya 1 y’isi , iyi nyubako yahise itangira gukorerwamo n’ubutegetsi bwa Pologne ,maze ikajya iteraniramo inama za Guverinoma.

Mu ntambara ya 2 y’isi , iyi nyubako yigaruriwe n’Abadage , ku izina rya Deutsches Haus ,bituma irindwa ukwangirika gukabije kuko abadage bayirindiye umutekano.

Mu 1994 ,agace kayo gato kayigize ,kahindutse Ingoro ya Peresidensi ya Pologne ari naho Perezida n’umuryango we batuye kuri ubu.

7.Rashtrapati Bhavan i New Delhi mu Buhinde

Iyi ni ingoro iturwamo n’abaperezida b’igihugu cy’u Buhinde,ikaba yubatse mu mujyi wa New Delhi,umurwa mukuru wa politiki w’u Buhinde .

Guhera mu 1950 iyi nyubako y’akataraboneka yari ifite akazina ka “Viceroy’s House ″ikaba yari yaragenewe guturwamo na Guverineri Jenerali w’u Buhinde,wagombaga kuba ari Umwongereza.

Ibinyamakuru byo mu Buhindi bwiza.com ikesha iyi nkuru, bitangaza ko umukuru w’u Buhinde ubusanzwe wamye ari Calcutta ,kugeza mu 1911 ariko guhera ubwo ,byemejwe ko wimukira i New Dheli,ku cyemezo cyafashwe n’Umwami George V, hari kuwa 12 Ukuboza 1911.

Umunyabugeni w’Umwongereza Bwana Edwin Landseer Lutyens ,umwe mu bari bashinzwe ku kwita ku iterambere ry’uyu mujyi wa New Dheli ,mu biro bya Guverineri Jenerali ,yahise ahabwa amabwiriza yo gutangira gutunganya igishushanyo mbonera cy’iyi ngoro. Iyi nzu rero ifatwa n’Abahinde nk’inzu y’agatangaza mu gihugu cyabo,kuko mu kuyubaka,byose byakozwe mu ndangagaciro z’abahinde ubwabo.

6.Champs-Elysées ,Perezidansi y’u Bufaransa i Paris

Ubusanzwe ibi biro bya Perezida w’u Bufaransa byubatse ku muhanda witiriwe Avenue des Champs Elysées iherereye mu karere [ Arrondissement ] ka 8 , ni umuhanda wa Kilometero 1.9 na metero 70.

Hagati y’urubuga rwitwa Concorde,ndetse n’urundi rubuga ruzwi cyane rwitiriwe Charles de Gaulles,ahubatse Arc de Triomphe [ ikimenyetso kigondoye gikunda kubakwa mu mahuriro y’imihanda ,kikamanikwaho ibitambaro byanditseho ubutumwa buba bwateguriwe ibihe runaka ].

Kuri iyi ngoro kandi ,hakunda kubera akarasisi gakomeye k’ingabo z’ubufaransa ,kenshi kanatumirwamo izindi ngabo z’ahandi ku isi.

Champs-Elysées ni ahantu hubashywe cyane mu Bufaransa ,kandi hafatwa nk’ikimenyetso cy’ubuhangange bwabwo. Uyu muhanda kandi ni umwe mu mihanda ihuruza ba mukerarugendo baturuka imihanda yose ,baje kureba ubwiza bw’inyubako ikorerwamo na Leta y’u Bufaransa, inyubako ya Champs-Elysées.

  1. Ingoro y’i Carthage, ibiro bya Perezida wa Tunisia

Ingoro y’i Carthage ni inzu y’akataraboneka yubatse mu karere k’umujyi wa Tunis kitwa Carthage,aka karere kakaba ariko kakorerwagamo n’abategetsi b’u Bufransa bakolonizaga iki gihugu, kiri mu bihugu bikungahaye bya Afrika.

Carthage Palace kandi yubatse ku bilometero 15 ,uvuye mu mujyi wa Tunis rwagati , ku nkengero z’inyanja ya Méditerrannée .

Ni ahantu heza cyane ,abakerarugendo bakunda gusura ,kubera ubwiza bwaho bw’akataraboneka.

Aka gace kandi niko gaherereyemo ikibuga cy’indege rurangiranwa muri icyo gihugu,kizwi nka Tunis-Carthage Airport,gikoreshwa cyane n’indege za Kompanyi yo gutwara ibintu n’abantu mu kirere ya Tunisia , TunisAir yamamaye ku isi yose!

4.Kremlin, Perezidansi y’u Burusiya mu mujyi wa Moscow

Nibavuga Vladimir Poutine , umugabo wabaye ikimenywabose ku isi ,kubera ubuhangange bw’igihugu cy’u Burusiya, jya wumva iyi nzu y’igitangaza ikorerwamo imirimo yose y’ubutegetsi bwa bw’abarusiya ,nka Perezidansi yabwo.

Kuyireba neza ,uhagarara ku kiraro cyitwa Bolshoy Kamenny Bridge ,hakurya y’umugezi wa Moskiva uhinguranyamo hagati muri Moscow, mu ruhande rw’amajyepfo ,mu gihe mu burasirazuba hari Kiliziya nini cyane yitwa Saint Basil’s Cathedral, hamwe n’ubusitani bwa Alexander .

Kremlin kandi igoswe n’urukuta ruhambaye ( Kremlin Wall ),rutamirijwe iminara miremire yitwa The Kremlin Towers .

N’inzu yubaswe hagati ya 1482-1495 ,ikaba iri ku buso bwa 0,277 km², aha kandi hakaba haranakorerwagamo na guverinoma ya Republika Zunze Ubumwe z’Abasoviyeti guhera mu 1922-1991 .

Aba Russia iyo bashaka kuvuga ku ngingo zigirwa muri Kremlin ,bavuga ko ibiri kuhakorerwa ari ‹‹Kremlinogy›› , nko kugaragaza isesengurangingo cyangwa se ikibazo runaka kiri kwigirwa muri iyi nzu karundura.

Aha kandi hakaba hakorerwamo n’ibiro byose bihambaye nyo mu Burusiya harimo na za Minisiteri hafi ya zose.

  1. The Flagstaff , ni Perezidansi ya Ghana

Flagstaff ni inyubako Perezida wa Ghana akoreramo ,ikaba iherereye mu mujyi wa Accra,umurwa mukuru wa Ghana.

Ni inyubako yatashywe mu 2008 ,nyuma y’uko yuzuye itwaye akayabo k’amadolari miliyoni ijana na miringo irindwi z’amadolari ( M 170 $) .

Nyuma gato y’uko uwari Perezida John Agyekum Kufour ataha iyi nyubako ariko ,uwamusimbuye ku ntebe John Ata Mills yavuze ko adashaka gukorera mu nzu ifite izina ikomora ku bakoloni.

Niko kwimukira ahahoze n’ubundi hakorera aba perezida,hazwi nka Osu Castle ,gusa nyuma gato mu 2013 yaje kwivuguruza,asanga ni ngombwa ko asubira gukorera muri iyi nzu nini kandi nziza.

Ubusanzwe iyi nzu igira akandi kazina ka Golden Jubilee ,gusa izina rizwi mu rwego mpuzamahanga ni Flagstaff .

Nkuko izindi perezidansi ahenshi ku isi usanga zigendererwa cyane n’abashyitsi baba basuye igihugu,kimwe n’abakerarugendo ,iyi nyubako nayo ikunda gusurwa muri Ghana,ndetse n’abaturage bahaturiye bayisura kenshi ,baje no kureba ubwiza bwayo.

2.White House, Perezidansi ya Leta Zunze Ubumwe z’Amerika

White House ni inzu iri mu zibarirwa mu nini ku isi,ikaba ariyo ikorerwamo ,kandi ikanaturazwamo umuryango w’umuperezida wese w’Amerika kuva mu 1800.

Igishushanyo cy’iyi nyubako cyakozwe n’umuhanga w’umunyabugeni w’umunya Danemark witwa James Hoban ,imirimo yo kuyubaka ikaba yari yaratangiye ku wa 13 Ukwakira 1792 isozwa muri 1800 ,hanyuma nyuma y’umwaka umwe Perezida Thomas Jefferson atangira gukoreramo ku mugaragaro mu 1801 .

White house

Ahagana mu 1814 mu gihe intambara yari irimbanije hagati y’abanyamerika n’abongereza ,ingabo z’abongereza zatwitse umujyi wa Washington ,maze Perezida Monroe yimukira mu bindi bihande byasigaye bidakongejwe n’ingabo z’abongereza,ariko Monroe akomeza gukorera muri iyi nyubako.

Nyuma yo kugenda ikorerwa amavugurura n’abaperezida batandukanye b’Amerika kandi ,mu 1909 nibwo uwari Perezida icyo gihe William Howard Taft yunganijeho ikindi gihande akita The Oval Office ,kugeza magingo aya ,iki gice nicyo kibarwa nka Ofisi bwite umukuru w’igihugu akoreramo muri Amerika.

Iyi nzu icyo gihe yubaswe itwaye amadolari 232 371 83 $ ahwanye na 3,279,177 $ ubaze mu gaciro k’amadolari ya none.

1.Village Urugwiro, Perezidansi y’u Rwanda

Village Urugwiro ni ibiro by’umukuru w’igihugu cy’u Rwanda akoreramo..

Wikipedia dukesha aya makuru ,ivuga ko Village Urugwiro yubaswe muri Gicurasi 1979 ,nk’ahantu hari hateguriwe by’umwihariko kwakira inama mpuzamahanga yahuzaga u Bufaransa n’Afrika ku nshuro ya 6 .

Ni inama karundura izwi nka Franco-African Summit , kugeza magingo aya, iyi nama ikaba ikunze gusiga ibikorwaremezo bikomeye mu bihugu igenda iberamo nkuko bigenda bikurakuranwa.

Iyi nyubako nta byinshi twayivugaho,cyane ko usanga binagoye kumenya uko iyi nzu yubatse utarageze muri Perezidansi y’u Rwanda imbere, kuko bitoroshye kuhabona n’amaso.