Menya byinshi ku isuzuma rikorerwa imirambo, ‘Autopsy’, igikorwa gitera ubwoba benshi

Abaganga muri Leta ya California muri Werurwe bemeje ko umusore w’umwirabura witwa Stephen Clark wishwe na Polisi, nta na rimwe mu masasu umunani yamurashe ryigeze rimufata mu gituza, bayivuguruza ko yarashwe ageragaza kuyirwanya.

Nyuma y’isuzuma ry’umurambo bamukoreye bareba icyamwishe n’uburyo yapfuyemo, ‘Autopsy’, bemeje ko amasasu atandatu yayarashwe mu mugongo, irindi mu rubavu, irya munani mu kuguru.

Iyi nkuru ntigaruka kuri iki kirego, ahubwo iragaruka kuri Autopsy muri rusange.

Amateka yerekana ko igikorwa gifitanye isano na Autopsy cyakorewe bwa mbere mu Misiri, ubwo hatunganywaga imirambo ngo imare igihe ‘mummification’ mu myaka iri hagati ya 2001-3000 mbere ya Yezu.

Autopsy nyayo yakorewe umurambo w’umunyapolitiki wo mu Baromani, Julius Caesar, wishwe atewe ibyuma inshuro 23 n’abasenateri batavugaga rumwe mu 150. Ibi nabyo byakozwe kera mbere ya Yezu.

Mu kiganiro  Dr. Hakizimana François Xavier yagiranye n’itangazamakuru, Umuganga w’inzobere mu bijyanye no kunganira ubutabera, ukorera ku bitaro bya Kacyiru, yavuze ko “Autopsy’ ikorwa harebwa ibimenyetso bigaragarira amaso n’ibitayagaragarira, bishingirwaho hemezwa uko umuntu yapfuye n’icyamwishe.”

Uyu muganga yavuze ko bikorwa hasuzumwa aho umurambo wasanzwe cyangwa hasuzumwa umubiri inyuma hawo no mu nyama z’imbere.

Inshuro nyinshi bikorwa hagamijwe korohereza iperereza, byasabwe n’ubugenzacyaha, ubushinjacyaha, Polisi cyangwa umuryango w’umuntu wapfuye.

Mu birebwa bigaragarira amaso, harimo nk’amaraso, ibikomere, uruhande umurambo wari uryamiyemo, imyenda yari yambaye; byarangira umuganga akinjira mu gikorwa nyir’izina cyo gufungura umurambo.

Mu nyama z’imbere, asatura mu gice cy’agatuza, inda n’umutwe ariko bitewe n’icyo atekereza ashobora no gufungura ibice by’amaboko n’amaguru.

Dr. Hakizimana avuga ko ‘Amaguru n’amaboko bishobora gusaturwa nk’igihe umuntu yaba yakuruwe hasi cyangwa yakubiswe imigeri mu maguru.’

Dr. Hakizimana yavuze ko icyumba bikorerwamo gitera ubwoba abatabimenyereye, ku buryo babanza gukoreshwa umwitozo w’uko bikorwa mu mashusho, babona bibateye ubwoba bagahitamo kutabireba.

Icyo cyumba njye naragisuye. Nabonyemo ibyuma n’urukero by’ubwoko butandukanye, ibitanda byabugenewe, bitunganyirizwaho imirambo bitewe n’uko imeze. Ababireba ntibatinya ibyo byuma ahubwo batinya igikorwa nyir’izina cyo gusatura umurambo.

Dr. Hakizimana yakomeje agira ati “Imirambo myinshi, uzasanga bagarukira ku gufungura ijosi, agatuza n’inda. Noneho n’umutwe, bagakata amagufa n’urukero rwihariye rukata ay’umutwe, ugakuraho akantu k’akagofero kugira ngo ureba neza ubwonko.”

Mu gatuza, inyama zisuzumwa ni ibihaha n’umutima, mu nda ni igifu, umwijima, urwagashya, indurwe, impyiko, impindura, ubura, nyababyeyi n’izindi, hagamijwe kureba niba nta yindi ndwara yaba yamwishwe itandukanye n’impamvu ikekwa.

Hari igihe n’amaso biba ngomba ko apimwa cyangwa amazi abamo, bashaka kumenya igihe umuntu yapfiriye.

Muganga hamwe n’undi muforomo umufasha, bakuramo bakanasuzuma inyama ku yindi, barangiza bakazisubiranya.

Aba afite ubushobozi bwo kumenya ibyakorewe umurambo mbere na nyuma y’uko umuntu apfa, bikaba igisubuzo ku basibanganya ibimenyetso.

Nta bice abaganga basigarana ?

Kimwe mu bibazo by’amatsiko nagiye nifuza kubaza Dr. Hakizimana, nawe ushobora kuba warumvise, ni uko hari ingingo zikurwa mu mirambo zigahabwa abarembye.

Yansubije ko bitajya bibaho keretse bibaye ngombwa ko hari igice cy’umubiri gisigaranwa kigiye gukorwaho ubushakashatsi bwarengera ubuzima bw’abandi amagana.

Ibi ngo bifasha gusobanukirwa neza niba umuntu wapfuye, ataba yazize indi ndwara itigeze ikekwa nka Kanseri, umutima n’izindi.

Ati “Biravugwa cyane nanjye njya mbyumva. Ariko utwo ni uduce duto ku buryo n’umuntu muzima twatumukuramo. Uzajya wumva nk’umuntu akubwira ngo bambwiye ko ndwaye kanseri, bamvanamo uduce. Ni bene utwo. Ntabwo ari inyama yose tuba twafashe.”

Mu bihugu byateye imbere, binafite amategeko abemerera gutanga ingingo z’umuntu wapfuye, zihabwa abazikeneye barembye. Mu Rwanda ngo abantu ntibarabyumva ariko babyumvise, itegeko rikajyaho naho byakorwa.

Autopsy ntikorwa mu nyungu z’ubutabera gusa

Dr. Hakizimana ati “Inyungu ya mbere ituma dukora autopsy, si iy’ubutabera, ntabwo ari iy’abaganga. Ni iy’abasigaye bariho […] mu bindi bihugu byateye imbere, barayikora, bakamenya icyamwishe, bigatuma babasha gukingira indwara zari kuzica abantu mu gihe kiri imbere.”

Ngo hari abicwaga n’izindi ndwara nk’imitima n’izindi, bigatahurwa nyuma kubera autopsy.

Yatanze urugero rw’umurambo w’umuturage wo mu Karere ka Kamonyi, mu muryango we bari bafite ikibazo cyo gupfusha abantu batarengeje imyaka 50, bitahurwa basuzumye umurambo waho wa kane, uwo muryango uhita ugirwa inama zawufasha.

Hari igihe habura icyateye urupfu

Dr. Hakizimana ahamya ko igihe cyose umurambo ushobora gusuzumwa ariko iyo bikozwe mbere nibwo haboneka ibimenyetso byoroshye gusobanurwa.

Rimwe na rimwe, umurambo ushobora gusuzumwa ntihaboneka icyo umuntu yazize, ariko akenshi biterwa n’ubushobozi bw’ibyuma n’ikoranabuhanga ryifashishijwe.

Yavuze ko mu Rwanda imirambo isuzumwa, hakamenyekana impamvu n’uburyo umuntu yapfuyemo ku kigero cya 98% ariko mu bihugu byateye imbere, bagira n’ikoranabuhanga mu bwicanyi ku buryo bigorana.

Abakora Autopsy ni mbarwa mu Rwanda

Dr Hakizimana yavuze ko imbogamizi iri suzuma rifite mu Rwanda harimo umubare muto w’inzobere z’abaganga, kuko ishami rukumbi rifite ababizobereye ry’ibitaro bya Kacyiru harimo babiri n’undi umwe wize ibifitanye isano nabyo, naho ahandi baba babifiteho ubumenyi bw’ibanze.

Ibitaro bya Kacyiru bikora autopsy zigera ku 600 ku mwaka.

Autopsy irahenze

Gusuzuma ubwoko bubiri bw’amatembabuzi yo mu mubiri bitwara arenga miliyoni y’amanyarwanda mu gihe ushatse gupima buri kintu, birenza miliyoni 20 Frw.

Imirambo ipimwa mu Rwanda iri nko ku gipimo cya 5%, yiganjemo ipimwa ku mpamvu z’ubutabera.

Umurambo usuzumwa inyama z’imbere, umuganga w’inzobere bimutwara amasaha ari hagati y’atatu n’atanu ariko kumenya icy’iby’ibanze ni isaha imwe.

 

Leave a Reply

Your email address will not be published. Required fields are marked *