Dr Sezibera yasabye ko AU yatangira gukorera ku mihigo

Minisitiri w’Ububanyi n’amahanga n’ibikorwa by’Umuryango wa Afurika y’Iburasirazuba, Dr Richard Sezibera, yasabye ko hashyirwaho uburyo abakozi ba Komisiyo y’Umuryango w’Ubumwe bw’Afurika batangira gukorera ku mihigo.

Yavuze ko ari bwo buryo bwo kugera ku ntego uwo muryango wiyemeje zo guteza imbere umugabane wa Afurika.

Minisitiri Sezibera yabitangaje ku wa Gatatu tariki 14 Ugushyingo, mu nama idasanzwe ihurije hamwe ba Minisitiri b’ububanyi n’amahanga b’ibihugu bigize AU, ku cyicaro cyayo i Addis Abeba muri Ethiopia.

Iyo nama iriga ku ngingo zitandukanye zirimo kwishakamo ubushobozi bwo gukora ibikorwa bya AU no gushyiraho Ikigo cya AU gishinzwe Iterambere (AU Development Agency).

Atangiza iyo nama, Dr Sezibera yashimye ubufatanye ibihugu bya Afurika byagaragaje mu myaka ibiri ishize none amavugurura ya AU akaba ageze ku rwego rushimishije.

Yavuze ko ibiganiro byose byagiye biba byatanze umusaruro, asaba ubufatanye kugira ngo bikomeze.

Mu mavugurura ya AU harimo no kuvugurura imikorere ya Komisiyo y’uwo muryango ari nayo ikurikirana umunsi ku munsi ibikorwa byawo.

Dr Sezibera yavuze ko kugira ngo iyo Komisiyo igere ku ntego, hakwiriye kwigwa ku buryo bwo kuyishakira abakozi bashoboye kandi hagategurwa n’uburyo bwo gukorera ku mihigo.

Yagize ati “Hakenewe uburyo bwo gusuzuma no kubaza buri wese inshingano ze. Uburyo bwo gukorera ku mihigo bugomba kongerwamo imbaraga haba ku bayobozi bakuru n’abakozi, hagashyirwaho n’ingamba ku batakoze ibyo bashinzwe.”

Yongeyeho ati “Mu gihe dutegura uburyo bwo kugendera ku mihigo, dukwiriye kwihatira gukora neza ibyo dushinzwe haba twe n’ibihugu byacu kugira ngo tugere ku ntego zacu kandi igihe tutabikoze tukabibazwa.”

Yashimye uburyo inkunga zifasha ibikorwa bya Komisiyo zagabanyutse uyu mwaka kubera kwiyongera kw’imisanzu y’ibihugu, aboneraho gusaba gukomeza uwo murongo.

Ingengo y’imari AU izakoresha mu 2019, yagabanutseho 12% ugereranyije n’iy’umwaka ushize. Mu 2019, ingengo y’imari ya AU izaba ingana na miliyoni 408 z’amadolari. Ibihugu bya Afurika biyifitemo uruhare rwa 66%, bingana na miliyoni 269 z’amadolari naho abaterankunga bakagiramo uruhare rwa 34% bingana na miliyoni 139 z’amadolari.

Niyo nkeya mu zo AU yakoresheje mu myaka ine ishize, ikaba iya mbere igizwemo uruhare runini n’ibihugu bya Afurika.

Mu mavugurra ya AU harimo ko buri gihugu gikwiriye kujya gitanga 0.2% by’imisoro icyinjiramo ku bicuruzwa biva mu mahanga kugira ngo uwo muryango wihaze ku ngengo y’imari.

Intego ni ukubona nibura miliyari 1.2 z’amadolari azajya afasha ibikorwa bya AU buri mwaka, igasezerera burundu inkunga z’amahanga.

Dr Sezibera kandi yashimye ubufatanye bwaranze ibihugu bya Afurika mu minsi ishize, by’umwihariko bishyigikira abakandida b’Abanyafurika mu matora y’Umuyobozi w’Ishami rya Loni ryita ku buzima (OMS) n’amatora y’Umuryango w’Ibihugu bikoresha Igifaransa (OIF).

Mu matora ya OMS aherutse, umunya- Ethiopia Dr Tedros Adhanom Ghebreyesus, ni we watorewe kuyiyobora, mu gihe Umunyarwandakazi Louise Mushikiwabo ari we watorewe kuyobora OIF.

Inama idasanzwe y’abaminisitiri b’ububanyi n’amahanga ba AU irasozwa kuri uyu wa Kane tariki 15 Ugushyingo 2018.

 

 

Leave a Reply

Your email address will not be published. Required fields are marked *