Icyo Zari yavuze ku byo kuba yajyana Diamond mu nkiko amwaka indezo

Zari Hassan ugiye kumara amezi atatu atandukanye na Diamond Platnumz bahoze babana yagarutse birambuye ku mpamvu yahisemo gusesa umubano wabo ku munsi w’abakundanye anasubiza ibyibazwa ku kuba yamuregera ubutabera ku bwo kutita ku bana babyaranye.

Uyu mugore amaze iminsi muri Kenya aho yakoreye urugendo ku bw’igitaramo cyitwa ‘The Colour Purple’ giteganyijwe kubera kuri Uhuru Gardens mu Mujyi wa Nairobi. Mbere y’igitaramo, yasuye abanyeshuri biga kuri Korogocho anafasha abagore barwariye mu Bitaro bya Kayore.

Zari yagiranye ibiganiro bitandukanye n’ibitangazamakuru bikomeye i Nairobi ahishura bimwe mu byo atari yaravuze ku mibanire ye na Diamond, ibijyanye n’imibereho ye muri iki gihe adafite umugabo ndetse n’uko abasha kurera abana be agakomeza akazi ke nka rwiyemezamirimo bitamurogoye.

Mu kiganiro yagiranye na Mpasho yavuze ko adateganya kuba yarega Diamond amwaka indezo cyangwa amuhatira gukunda no kwita ku rubyaro rwe ndetse ahamya ko bameze neza.

Yagize ati “Kuki se namurega? Mu ntekerezo zanjye numva ko ari inshingano ze kwita ku bana be niba koko yizera ko agomba kubikora. Simbona impamvu n’imwe yatuma mujyana mu rukiko kugira ngo aze kureba abana be. Ntabwo ndi muri icyo cyiciro njye.”

Mu kindi kiganiro yagiranye na Citizen TV, Zari yagarutse ku buryo yafashe umwanzuro wo gutandukana na Diamond agahitamo kubitangaza ku munsi w’abakundanye. Yavuze ko ari ibintu yari amaze igihe atekerezaho ariko ataritinyuka ngo afate uwo mwanzuro.

Mu buryo bwo gushyenga yabanje kuvuga ati “Ubundi se ni ubuhe buryo buruta buriya bwo kwibukirwaho kuri uriya munsi?”

Yongeye ati “Niteguraga kujya ku kazi, icyo gihe nari mfite ibintu byinshi ntekereza muri njye, niko kuvuga nti ‘uzi n’ikindi, Ibi bintu nabikora, nabishobora, ndashaka gutandukana n’uyu mutwaro ushaje, ndashaka gutangira urugendo rushya’.”

“Ndavuga ku buzima, ni igika nasomaga kandi n’ubundi naragisomye, nzi neza n’uburyo kirangiramo. Naribazaga nti ndamara iki hano nsoma ibintu nasomye nzi neza n’uko iyo nkuru irangira? Nahise mvuga nti uri ahashize, amagambo yaje nko mu isegonda rimwe gusa mba mbyigobotoye ntyo.”

Zari yavuze ko nubwo yafashe umwanzuro wo gutandukana na Diamond bitari ibimworoheye kuko yatekerezaga ku bana babyaranye bikamusaba kongera gusubiramo iyo nyigo anasuzuma neza icyo akeneye nk’umuntu akagitandukanya n’ibyifuzo.

Zari yavuze no ku gukoresha agakingirizo

Yagiriye inama abakobwa banyura mu byo yanyuzemo ko bajya bazinga utwangushye bakisubirira ku babyeyi babo hanyuma bagatangira ubuzima bundi bushya aho kuba indushyi z’abasore babaca inyuma.

Zari ageze ku cyiciro cy’abasore baca inyuma abakunzi babo, yababwiye ati “Simbagira inama yo guca inyuma abo mukundana, ariko mugihe kwihangana byanze, mugerageze mukoreshe udukingirizo.”

Ibi kuri bamwe byumvikanye nko kunenga Diamond wamuciye inyuma ntakoreshe agakingirizo.

Yakomeje ati “Nabwo nutabikora bizakuzanira abana utifuzaga ahubwo bishobora no kukubera intandaro yo kwandura indwara zandurira mu mibonano mpuzabitsina nk’agakoko ka Virusi itera SIDA, atari n’ibyo gusa ariko ugiye kuzizanira n’umuntu wasize waraye ijoro ategereje ko umusanga mu rugo. Ubwo urumva ari inde urita kuri ibyo bibondo?”

“Njye n’abana banjye turi inshuti zikomeye”

Zari yavuze ku buryo abasha gukomeza umuryango we no mu gihe adafite umugabo, avuga ko byose abishobozwa no kuba agirana umubano wihariye n’abana be bakamwumva na we akamenya icyo bakeneye.

Yavuze ko icyo yibandaho mu mibereho ye ari ugushyira iby’ingenzi imbere akabikora mbere y’ibidafite agaciro kanini. Yanasubije ibibazo ku bijyanye no kuba abana be babangamirwa no kuba ari icyamamare.

Ati “Ntabwo abana nabashyira kure y’imbuga nkoranyambaga, sinabasha kubabuza kumenya ibiziberaho, n’iyo nabigenza ntyo, inshuti zabo zo ku ishuri birangira zibibabwiye byose ati ‘Wenda hari agakuru kerekeranye na mama wanyu ku mbuga nkoranyambaga, mwatubwiye neza uko byifashe, ubundi byagenze gute’ n’ibindi nk’ibyo.”

Zari yatanye na Diamond amuziza kujarajara mu bagore

Yakomeje ati “Rero njye n’abana banjye turaganira, turi inshuti, dufitanye umubano uri ku rwego rw’ubushuti bukomeye, turicara tukaba twavugana buri kintu, nkababwira nti ‘nyoko muramuzi? Muratekereza se ko yaba yakoze biriya?’ bakambwira bati ‘Oya’, nkababwira nti ‘Muzi se impamvu abantu bari kubivuga kuriya?’ bakiriza, ni ibyo.”

Urukundo rwa Zari na Diamond rwashyizweho akadomo ku wa 14 Gashyantare 2018 ku munsi wahariwe abakundana [Saint Valentin] biturutse ku mahitamo y’uyu mugore wavuze ko yasheshe uwo mubano ku bwo kunanirwa kwihanganira gucibwa inyuma, undi avuga ko yari yaramuburiye kwitegura kuzamubonana n’abagore benshi bitewe n’umwuga akora.

Zari muri iki gihe yirerana abana batanu barimo uwitwa Pinto, Quincy na Didy yabyaranye na nyakwigendera Ivan Ssemwanga ndetse n’abandi babiri Nillan Dangote na Latifah Dangote yabyaye kuri Diamond.

Zari yakomoje ku gukoresha agakingirizo mu biganiro yatumiwemo muri Kenya

Zari amaze iminsi muri Kenya mu bikorwa bitandukanye

Leave a Reply

Your email address will not be published. Required fields are marked *