Uwashinze WhatsApp yakuyemo ake karenge kubera kutumvikana na Mark Zuckerberg wayiguze

Umuyobozi wa WhatsApp, Jan Koum, yemeje ko agiye kuyivamo biturutse ku bwumvikane buke na Facebook yayiguze ku bijyanye n’ikibazo cyo kurinda umutekano w’abayikoresha no gutangira kubyazwa amafaranga.

Facebook iyobowe na Mark Zuckerberg ifite mu biganza izindi mbuga nkoranyambaga zikomeye ku Isi zirimo urwa WhatsApp yegukanye mu 2014 kuri miliyari 19 z’amadolari, rukoreshwa n’abarenga miliyari mu kuganira no guhererekanya amakuru ndetse n’urwa Instagram rutambutswaho amafoto n’amashusho magufi.

Washington Post yatangaje ko Jan Koum agiye kuva ku mwanya w’ubuyobozi yari afite muri Whatsapp ndetse agasezera no mu bagize Inama y’Ubutegetsi ya Facebook Inc yinjiyemo mu bwumvikane we na mugenzi we witwa Brian Acton bagiranye na Mark Zuckerberg ubwo bamugurishagaho porogaramu yabo.

Yagize ati “Ikinyacumi kigiye gushira njye na Brian dutangije WhatsApp, kandi rwari urugendo ruryoshye hamwe n’abantu beza. Gusa ubu ni igihe ko ngenda. Ngiye gufata igihe cyo gukora ibyo nkunda iyo ntari mu ikoranabuhanga […] Nzakomeza kuyishimira ariko ndi hanze yayo.”

Ubu butumwa munsi yabwo ku rubuga rwa Facebook hagaragaraho ubwanditswe na Zuckerberg amusubiza aho yagize ati “Ngushimiye buri kimwe cyose wakoze mu guhuza abatuye Isi, n’ibyo wanyigishije byose, harimo kurinda umutekano w’abakoresha urubuga n’imbaraga bifite mu gukura izo mbaraga mu bikomerezwa zikajya mu biganza by’abaturage. Izo ndangagaciro zizahora ziri mu mutima wa WhatsApp.”

Nubwo Koum atigeze asobanura impamvu nyayo yihishe inyuma yo guta urubuga yashinze, icyo kinyamakuru cyo cyavuze ko amakuru yizewe mu bo bagiranye ibiganiro byimbitse ari uko habayeho ubwumvikane buke ku mikoreshereze y’amakuru y’abakoresha WhatsApp, yizera ko ngo Facebook ifite icyifuzo cyo gutangira kuyagurisha ku bigo.

Koum afashe uyu mwanzuro nyuma ya Acton bashinganye WhatsApp akaza kuyivamo muri Nzeri 2017. Muri Werurwe, uyu mwaka, yinjiye mu barwanya byeruye imikorere ya Zuckerberg n’ikigo ayoboye.

Acton, abinyujije kuri Twitter, icyo gihe yanditse ko ari cyo gihe ko Facebook isibwa [#deleteFacebook], ubutumwa bwahererekanywaga cyane ku mbuga nkoranyambaga mu minsi ishize ubwo urwo rubuga rwashinjwaga kugurisha amakuru y’abarukoresha ku kigo cya Cambridge Analytica cyo mu Bwongereza cyakoranye na Donald Trump ubwo yiyamamarizaga kuba Umukuru w’Igihugu muri Leta Zunze Ubumwe za Amerika.

Abashinze WhatsApp bari bafite icyerekezo cyo gukora urubuga rusigasira amakuru y’abarukoresha ndetse ntirurangweho amatangazo no kwamamaza. Koum, ubwo bayigurishaga kuri Facebook yijeje abayikoresha ko izo ndangagaciro zayo zitazavogerwa nubwo nyuma byahindutse.

Mu 2016 WhatsApp yafashe icyemezo cyo gutangira gutanga amakuru y’abayikoresha, arimo na nimero za telefoni, bigahabwa Facebook. Ibi ntibyakiriwe neza by’umwihariko ku Mugabane w’i Burayi aho yabujijwe ibyo bikorwa ndetse igacibwa amafaranga nk’igihano.

Mu kwinjira mu bucuruzi byeruye mu gihe gishize hatangijwe icyiswe WhatsApp Business nk’uburyo bushya bwo gufasha ibigo ndetse hariho umugambi ko izatangira kubyazwa amafaranga abayikoresha bakajya bishyura.

Jan Koum uri mu bashinze WhatsApp yakuyemo ake karenge kubera ‘kutumvikana na Mark Zuckerberg wayiguze’

Zuckerberg aherutse gutumizwa mu nteko kwisobanura ku bijyanye n’uburyo Facebook irindamo umutekano w’amakuru y’abayikoresha

Zuckerberg yegukanye WhatsApp mu 2014 ayiguze miliyoni 19 z’amadolari n’abayishinze

Leave a Reply

Your email address will not be published. Required fields are marked *